GAZEL - 40 
  
I

Bir safâ bahş edelim gel şu dil-i nâ-şâda
Gidelim serv-i revânım yürü Sa‘d-âbâda
İşte üç çifte kayık iskelede âmâde
Gidelim serv-i revânım yürü Sa‘d-âbâda.


II

Gülelim oynayalım kâm alalım dünyâdan
Mâ-yı tesnîm içelim çeşme-i nev-peydâdan
Görelim âb-ı hayât akdığın ejderhâdan
Gidelim serv-i revânım yürü Sa‘d-âbâda.


III

Geh varup havz kenârında hırâmân olalım
Geh gelüp Kasr-ı Cinan seyrine hayrân olalım
Gâh şarkı okuyup gâh gazel-hân olalım
Gidelim serv-i revânım yürü Sa‘d-âbâda.


IV

İzn alup cuma namâzına deyü mâderden
Bir gün uğrılıyalım çarh-ı sitem-perverden
Dolaşup iskeleye doğru nihan yollardan
Gidelim serv-i revânım yürü Sa‘d-âbâda.


V

Bir sen ü bir ben ü bir mutrıb-ı pâkîze-edâ
İznin olursa eğer bir de Nedîm-i şeydâ
Gayrı yârânı bu günlük edüp ey şûh fedâ
Gidelim serv-i revânım yürü Sa‘d-âbâda.

Nedim
 ( 1681 - 1730 )


Nedîm Divânı - S. 245-6 - Prof. Dr. Muhsin Macit
TC Kültür ve Turizm Bakanlığı Kültür Eserleri-511
 


 

Safâ: gönül şenliği, eğlence
Dil-i nâ-şâd: muradına ermemiş gönül
Serv-i revân: selvi gidişli
Âmâde: hazır, hazırlanmış
Bahş: bağışlama, verme
Kâm almak: murat almak, lezzet almak
Mâ-yı tesnîm: Cennet suyu
Çeşme-i nev-peydâ: yeni çeşme
Âb-ı hayât: Hayat suyu
Hırâmân: salınarak naz ve edalı yürümek
Kasr-ı Cinan: Cennet Kasrı
Mâder: anne
Uğrılamak: çalmak
Çarh-ı sitem-perver: zalim felek
Nihan: gizli saklı
Mutrib: şarkı söyleyen, çalgı çalan
Pâkîze-edâ: saf, lekesiz tarz, davranış
Şeydâ: Divane, tutkun
Gayrı yârân: öteki dostlar
Fedâ: gözden çıkarma